ஐபிஎல் வந்தாலே கிரிக்கெட் ரசிகர்களுக்கு கொண்டாட்டம்தான். வருடம் முழுவதும் இந்திய அணி என ஒற்றுமையாக நின்று ஆதரவு தரும் ரசிகர்கள் இந்த ஐபிஎல் காலக்கட்டத்தில் மட்டும் CSK, RCB, Mumbai Indians என உள்ளுக்குள்ளே அணி பிரிந்து தங்கள் விருப்பமான அணிக்காக சண்டை போட்டுக் கொள்வது இயல்பு. அப்படி ஐபிஎல்லில் அதிகமான ரசிகர்களை கொண்டுள்ள அணி என்றால் அது சென்னை சூப்பர் கிங்ஸ் அணிதான், முக்கியமாக அதற்கு காரணம் தல என அன்போடு அழைக்கப்படும் எம்.எஸ்.தோனி (MS Dhoni).
அனைத்து விதமான கிரிக்கெட்டிலிருந்தும் ஓய்வு பெற்ற தோனி, தனது ரசிகர்களுக்காக வேண்டி தொடர்ந்து ஐபிஎல்லில் சிஎஸ்கே அணிக்காக விளையாடி வருகிறார். சிஎஸ்கே அணி தொடங்கப்பட்டது முதல் அணியின் கேப்டனாக செயல்பட்டு வந்தார் தோனி. சிஎஸ்கே அணிக்காக இசையமைப்பாளர் அனிருத் இசையமைத்த தீம் பாடல்தான் இன்று வரை சிஎஸ்கே ரசிகர்களின் தேசிய கீதமாக இருந்து வருகிறது. அதில் ‘நம்ம தல தோனிக்கு பெரிய விசில் அடிங்க’ என்ற வரிகள் இப்போதும் ரசிகர்களை கொண்டாட்டத்தில் தள்ளும். அப்படிப்பட்ட தீம் பாடலைதான் இந்த சீசனில் (IPL 2026) மாற்றி அமைக்க உள்ளது.
புதிய சிஎஸ்கே தீம் பாடல் மார்ச் 22ம் தேதி வெளியாக உள்ளதாக சூசகமாக ஒரு ப்ரோமோவை சிஎஸ்கே வெளியிட்டுள்ளது. இந்த புதிய பாடலையும் அனிருத்தான் இசையமைத்திருப்பார் என எதிர்பார்க்கப்படுகிறது. தற்போது சிஎஸ்கே அணியில் ஏராளமான புதியவர்கள் வந்துவிட்ட நிலையில் இந்த தீம் பாடல் தோனியை பற்றியதாக பெரிதும் இருக்காது என பேசிக் கொள்ளப்படுகிறது. இதற்கு பதிலளித்து வரும் சிஎஸ்கே ரசிகர்கள் “எங்க தலக்கு தனி தீம் பாட்டு எல்லாம் தேவையே இல்ல” என்று பேசி வருகின்றனர்.
ஆனால் சிஎஸ்கே திடீரென இப்படி தீம் பாடலை மாற்றுவதற்கு காரணம் தவெக தலைவர் விஜய்தான் என்றும் தகவல்கள் வெளியாகி வருகிறது. தவெக கட்சிக்கு விசில் சின்னம் ஒதுக்கப்பட்டுள்ள நிலையில், சிஎஸ்கே தீம் பாடலில் விசில் போடு என்ற வரிகள் வருவதால் அது தேர்தல் நடத்தை விதிகளுக்கு எதிரானது என்பதால் மொத்த தீம் பாடலே மாற்றி அமைக்கப்படுகிறது என்றும், புதிய தீம் பாடலில் விசில் என்ற வார்த்தை இடம்பெறாது என்றும் பேசிக் கொள்ளப்படுகிறது.
