தமிழ் சினிமாவில் கடந்த 2003ம் ஆண்டில் வெளியான ‘காதல் கொண்டேன்’ படத்தின் மூலம் அறிமுகமானவர் நடிகை சோனியா அகர்வால். செல்வராகவன் இயக்கத்தில் தனுஷ் நடித்த இந்த படத்தின் மூலம் தமிழ் சினிமாவில் அறிமுகமான சோனியா அகர்வால் அதன் பின்னர் கோவில், மதுர, 7ஜி ரெயின்போ காலனி என பல ஹிட் படங்களில் நடித்தார்.
தொடர்ந்து காதல் கொண்டேன், 7ஜி ரெயின்போ காலணி, புதுப்பேட்டை என செல்வராகவன் படத்தில் சோனியா அகர்வால் நடித்து வந்த நிலையில் இருவருக்கும் இடையே காதல் ஏற்பட்ட நிலையில் திருமணம் செய்து கொண்டனர். ஆனால் இந்த பந்தம் நீண்ட காலம் நீடிக்கவில்லை. 2006ல் திருமணம் செய்து கொண்ட அவர்கள் 4 ஆண்டுகளில் விவகாரத்தும் செய்து கொண்டனர்.
அந்த சமயங்களில் ஆக்டிவாக படம் இயக்கி வந்த செல்வராகவன் இடையே படம் இயக்குவதில் தொய்வு ஏற்பட்டது. பின்னர் தற்போது பல படங்களில் முக்கியமான கதாப்பாத்திரங்களை ஏற்று நடித்து வரும் செல்வராகவன் மீண்டும் படங்களை இயக்க ஆர்வம் காட்டி வருகிறார். ஏற்கனவே இவரது இயக்கத்தில் வெளியாகி ஹிட் அடித்த ‘ஆயிரத்தில் ஒருவன்’ படத்தின் இரண்டாம் பாகத்தை தனுஷை வைத்து இயக்க உள்ளதாக தகவல்கள் வெளியாகி வந்தது.
அதை தொடர்ந்து 7ஜி ரெயின்போ காலணி படமும் இரண்டாம் பாகம் வருவதாக பேசிக்கொள்ளப்பட்டது. இந்நிலையில் சமீபத்தில் செல்வராகவன் எக்ஸ் தளத்தில் ‘புதுப்பேட்டை’ படத்தின் இரண்டாம் பாகத்திற்கான வேலையை விரைவில் தொடங்க உள்ளதாக பதிவிட்டிருந்தார்.
மீண்டும் தனுஷ், ஸ்னேகா உள்ளிட்ட புதுப்பேட்டையில் நடித்த நடிகர், நடிகைகளை கொண்டு இரண்டாம் பாகம் உருவாக உள்ளதாக கூறப்படுகிறது. இந்த படத்தில் கொக்கி குமாரின் மனைவியாக சோனியா அகர்வால்தான் நடித்திருந்தார். ஆனால் விவாகரத்துக்கு பின்னர் செல்வராகவன் படங்களில் சோனியா அகர்வால் நடிக்கவில்லை. இந்நிலையில் புதுப்பேட்டை 2 வந்தால் அதில் சோனியா அகர்வால் நடிப்பாரா என்ற கேள்வி எழுந்தது.
இதுகுறித்து ஒரு நிகழ்ச்சியில் சோனியா அகர்வாலிடமே கேட்டபோது “புதுப்பேட்டை 2 படத்தில் நடிக்க அழைத்தால் நடிப்பேன். நடிப்பு என்னுடைய தொழில். செல்வராகவனோடு சேர்ந்து வேலை செய்வதில் எனக்கு எந்த பிரச்சினையும் இல்லை. ஆனால் இதுவரை புதுப்பேட்டை 2 படத்தில் நடிக்க வேண்டும் என அழைப்பு வரவில்லை” என்று தெரிவித்துள்ளார்.
இதனால் சோனியா அகர்வால் அந்த படத்தில் நடிக்க விருப்பமாய் இருக்கிறார் என்று தெரிகிறது. ஆனால் செல்வராகவன் அவரை நடிக்க அழைப்பாரா? செல்வராகவன் – தனுஷ் – சோனியா அகர்வால் காம்போ மீண்டும் தமிழ் சினிமாவில் கலக்குமா என்பதை பொறுத்திருந்துதான் பார்க்க வேண்டும்.
