சென்னையில் நேற்று நடைபெற்ற தமிழ்நாடு அரசு திரைப்பட விருது வழங்கும் விழாவில் விருதை மாற்றிக் கொடுத்த சம்பவம் வைரலாகியுள்ளது.
தமிழ்நாடு அரசு சார்பில் திரைப்படங்கள் மற்றும் சின்னத்திரை தொடர்களுக்கு விருதுகள் ஆண்டுதோறும் வழங்கப்பட்டு வருகிறது. பல்வேறு காரணங்களால் கடந்த 2016 முதல் 2022 வரையிலான காலக்கட்டத்தில் இந்த விருதுகள் வழங்கப்படாமல் இருந்தது. இந்நிலையில் சமீபத்தில் இந்த 7 ஆண்டுகளுக்கான விருதுகள் அறிவிக்கப்பட்டது. அதன்படி இயக்குனர்கள் மாரி செல்வராஜ், லோகேஷ் கனகராஜ், நடிகர்கள் சிவகார்த்திகேயன், சூர்யா, மஞ்சு வாரியர், கீர்த்தி சுரேஷ் என பலரும் விருதுகளை பெற்றனர்.
அதில் நடிகர் சூர்யாவிற்கு சிறந்த நடிகருக்கான விருதை துணை முதலமைச்சர் உதயநிதி ஸ்டாலின் வழங்கினார். அப்போது விருது சான்றிதழில் சூர்யாவின் பெயருக்கு பதிலாக இசையமைப்பாளர் ஏ ஆர் ரஹ்மான் பெயர் இருந்தது பரபரப்பை ஏற்படுத்தியது. ஆனால் அமைச்சர்கள், உதயநிதி உள்ளிட்டோர் அதை கவனிக்காத நிலையிலும், அந்த பெயரை கவனித்த சூர்யா பின்னர் அதை கொடுத்து மாற்றிக் கொள்ளலாம் என அதை பெரிதுப்படுத்தவில்லை. மேலும் விருது பெற்றபோது இயக்குனர் சுதா கொங்கராவை கை நீட்டி இது உங்களுக்கும்தான் என்று சைகை செய்தார்.
இந்த வீடியோ தற்போது சமூக வலைதளங்களில் வைரலாகியுள்ள நிலையில் அதை குறிப்பிட்டு காட்டி பேசி வரும் சூர்யா ரசிகர்கள், நீண்ட ஆண்டுகள் கழித்து விருது தரும்போது, அதுவும் சூர்யா போன்ற ஒரு பெரிய நடிகருக்கு தரும்போது கவனித்து தர வேண்டாமா என வருத்தம் தெரிவித்துள்ளனர்.
