பவா எடுத்த அதிர்ச்சி முடிவு.. லைவ்வை நிறுத்திய பிக்பாஸ்! – என்ன ஆச்சு?

விஜய் டிவியில் ஒளிபரப்பாகி வரும் பிக்பாஸ் தொடரில் பல பரபரப்பான விஷயங்கள் நடந்து வருகிறது. முதல் வார எலிமினேஷன் சுற்றில் பவா செல்லதுரைதான் எலிமினேஷன் ஆவார் என பெரிதும் எதிர்பார்க்கப்பட்டது. ஆனால் அதிர்ச்சிகரமாக அனன்யா போட்டியை எலிமினேட் செய்யப்பட்டார்.

இருந்தாலும் பாவா செல்லதுரையும் பிக் பாஸ் வீட்டை விட்டு கிளம்புவதற்கு விருப்பம் தெரிவித்தார். தொடர்ந்து அவருக்கு இருக்கும் உடல் நலப் பிரச்சினைகளும், பிக் பாஸில் இருக்கும் பிரச்சனைகளும் சேர்ந்து அவருக்கு சோர்வை ஏற்படுத்தி விட்டன.

எனவே நேற்று இரவு கன்ஃபஷன் அறைக்கு சென்ற பவா செல்லதுரை தன்னை வீட்டிற்கு அனுப்புமாறு கேட்டுக் கொண்டார். அதுவும் இன்னும் அரை மணி நேரத்தில் அனுப்புமாறு கேட்டுக் கொண்டார். அப்படியெல்லாம் யாரையும் அனுப்பிவிட முடியாது உங்களுக்கு வேண்டுமானால் ஒரு மருத்துவரை நியமிக்கிறோம் என்று பிக் பாஸ் கூறியும் அதற்கு பவா செல்லதுரை ஒப்புக் கொள்ளாததால் பேசிவிட்டு கூறுகிறேன் என்று கூறி இருந்தார் பிக் பாஸ்.

காலையில் இருந்து பவா செல்லதுரையை வீட்டில் காணாத நிலையில் இடையே பிக்பாஸ் லைவ் சில மணி நேரங்கள் நிறுத்தி வைக்கப்பட்டது. அதன் பின்னர் மீண்டும் லைவ் வந்தபோதும் பவா உள்ளே இல்லை. பின்னர் போட்டியாளர்களிடம் பேசிய பிக்பாஸ், பவா செல்லதுரை உடல்நலக்குறைவு காரணமாக போட்டியிலிருந்து வெளியேற்றப்பட்டு விட்டதாகவும், ஆனால் அவர் மருத்துவ சிகிச்சை பெற்று வருவதாகவும், தற்போது நலமுடன் உள்ளதாகவும் மட்டும் தெரிவித்துள்ளார்.

கடந்த சீசனில் ஜிபி முத்து இதுபோல எலிமினேஷன் இல்லாமலே திடீரென வெளியேறினார். ஆனால் அவரும் கமல்ஹாசன் வரும் வரை வார இறுதி வரை காத்திருந்து பின்னர்தான் வெளியேறினார். ஆனால் பவா எந்த முன்னறிவிப்பும் இன்றி சில மணி நேரங்களிலேயே வெளியேறிய சம்பவம் அனைவரையும் அதிர்ச்சிக்கு உள்ளாக்கியுள்ளது.