ரஜினிகாந்த் நடித்த பல திரைப்படங்களில் சில திரைப்படங்கள் மட்டும் மக்கள் மத்தியில் வெகுவாக பேசப்படும் திரைப்படங்களாக இருந்துள்ளன. அப்படியான திரைப்படங்களில் படையப்பாவும் முக்கியமான திரைப்படமாகும்.
எப்போதுமே தமிழ் சினிமாவில் பிரபலமான ஒரு ஹீரோவிற்கு வில்லனாக பெண்ணை நடிக்க வைப்பது குறைவுதான். அப்படியே நடித்தாலும் கூட அந்த பெண்ணுக்கு மாஸ் காட்சிகள் வைப்பது கடினம்தான். ஆனால் படையப்பா படத்தில் இதற்கெல்லாம் மாற்றாக அமைந்திருக்கும்.
படத்தில் ரஜினிக்காந்திற்கு சமமான மாஸ் காட்சிகள் நடிகை ரம்யா கிருஷ்ணனுக்கும் இருக்கும். படம் பெரும் வெற்றியை பெற்றதற்கு அதுவும் ஒரு முக்கிய காரணமாகும். இந்த படத்தின் கதையை எழுதும்போதே இயக்குனர் கே.எஸ் ரவிக்குமார் படத்தின் கதையை சற்று பெரிதாக எழுதிவிட்டார்.
ஆனால் கதையை படித்த உடனே படமாக்கிவிடலாம் என ரஜினி கூறியதால் மிக நீளமாக படத்தை எடுத்துவிட்டார் கே.எஸ் ரவிக்குமார். இதனால் மொத்தமாக படம் 19 ரீலுக்கு வந்துவிட்டது. பொதுவாக திரைப்படங்கள் அதிகப்பட்சம் 14 ரீலுக்குதான் எடுக்கப்படும். ஆனாலும் ரஜினிக்கு முழு படமும் பிடித்திருந்தது.
இதே போல பாலிவுட்டில் ஒரு திரைப்படம் நீளமாக எடுக்கப்பட்டு இரண்டு இண்டர்வெல் விட்டு வெளியானது. நாம் ஏன் படையப்பா படத்தையும் அப்படி வெளியிடக்கூடாது என நினைத்தார் ரஜினிகாந்த். எனவே இதுக்குறித்து கமல்ஹாசனிடம் கேட்டார்.
அதற்கு கமல்ஹாசன் “பைத்தியமா உனக்கு, அந்த மாதிரி எல்லாம் வெளியிட்டால் தமிழ் மக்கள் மத்தியில் வரவேற்பை பெறாது. இயக்குனரிடம் சொல்லி பட அளவை குறை” என கூறியுள்ளார். அதன் பிறகு பல காட்சிகள் குறைக்கப்பட்ட பிறகே படையப்பா திரைப்படம் வெளியானது. இந்த தகவலை கே.எஸ் ரவிக்குமார் ஒரு பேட்டியில் கூறியுள்ளார்.
