திரையில் வெளியாகி மக்கள் மத்தியில் குறைந்த வரவேற்பை பெற்ற திரைப்படமாக இந்தியன் 2 திரைப்படம் இருந்து வருகிறது. லைகா நிறுவனத்தின் தயாரிப்பில் பெரும் பொருட் செலவில் எடுக்கப்பட்டும் படத்திற்கு எதிர்பார்த்த வரவேற்பு கிடைக்கவில்லை.
இந்த நிலையில் நேற்று இந்த படம் நெட்ப்ளிக்ஸ் ஓ.டி.டியில் வெளியானது. சில திரைப்படங்கள் ஓ.டி.டியில் வெளியான பிறகு நேர்மறையான விமர்சனங்களை பெறும். ஆனால் இந்த படம் ஓ.டி.டியிலும் கூட எதிர்மறையான விமர்சனங்களையே பெற்றுள்ளது.
ஓ.டி.டி விமர்சனம்:
படத்தின் கதையை பொறுத்தவரை இந்த படத்தில் முக்கிய கதாபாத்திரமாக சித்தார்த் நடித்துள்ளார். சித்தார்த், ப்ரியா பவானி சங்கர் என நண்பர் குழு 4 பேர் இணைந்து சமூகத்தில் நடக்கும் லஞ்ச பிரச்சனைகளை யூ ட்யூப் வீடியோக்களாக வெளியிட்டு வருகின்றனர்.
அந்த சமயத்தில் இந்த லஞ்ச பிரச்சனை தலை விரித்தாடி ஆடவே இதை சரி செய்ய இந்தியன் தாத்தா வந்தால் மட்டும்தான் உண்டு என கம் பேக் இந்தியன் என்கிற ஹாஸ் டேக்கை ஷேர் செய்கின்றனர். வெளிநாட்டில் குரங்கு மான் என்று வித்தியாசமான வர்ம முறைகளில் கொலை செய்து கொண்டிருக்கும் இந்தியன் தாத்தா இதனை பார்த்துவிட்டு இந்தியாவிற்கு வருகிறார்.
பிறகு அவர் இளைஞர்களை எழ செய்து பெரும் மாற்றத்தை செய்ய நினைக்கிறார். அது அவருக்கு எவ்வளவு பெரிய பிரச்சனை உண்டு பண்ணுகிறது என்பதோடு திரைப்படம் முடிவடைகிறது. அடுத்த பாகத்தில் மீதி கதை வரும் என எதிர்பார்க்கப்படுகிறது.
படத்தில் உள்ள குறைகள்:
மொத்த படத்திலும் இந்தியன் தாத்தாவின் கதாபாத்திரம் மாறி இருப்பது படத்தில் பெரும் குறையாக இருக்கிறது. சேனாபதியை பொறுத்தவரை அவர் கொலையை ரசித்து செய்யக்கூடிய சீரியல் கில்லர் கிடையாது. தனக்கு அது பிடிக்கவில்லை என்றாலும் கூட வேறு வழியில்லை என்பதால் அந்த பாதையை தேர்ந்தெடுத்திருப்பார்.
ஆனால் இந்தியன் 2 வில் காட்டும்போது அவரை சீரியல் கில்லர் போலவும் கொலையை ரசித்து செய்வது போலவும் காட்டப்பட்டுள்ளது. மேலும் இந்தியன் படத்தில் அந்த வர்மத்திற்கு இருந்த மரியாதையே இந்த படத்தில் கேலிக்கு உள்ளாகியுள்ளது.
வர்மம் மூலமாக ஆணை பெண்ணாகவும், குதிரையாக குருவியாக என மாற்றுகிறார் இந்தியன் தாத்தா. பார்க்கவே அது நகைச்சுவையாக இருக்கிறது. படம் முழுக்கவே எதார்த்தத்தில் இருந்து மாற்றமாக இருக்கிறது. நாடக தன்மையுடன் இருக்கிறது.
இந்தியன் முதல் பாகத்தில் இந்தியன் தாத்தா சிக்ஸ் பேக்ஸ் காட்டி எல்லாம் சண்டை போட மாட்டார் என்றாலும் கூட அவருக்கு வைக்கப்பட்ட சண்டை காட்சிகள் ஏற்புடையதாகவும் ரசிக்கும்படியும் இருந்தது. ஆனால் இந்த படத்தில் அப்படி இல்லை. துண்டின் மடிப்பு கலையாமல் அதை தோளில் போட்டுக்கொண்டு சிம்பிளாக சண்டையிடுவதுதான் இந்தியன் தாத்தாவின் கெத்தான அம்சமாக இருந்தது.
ஆனால் இந்த படத்தில் சட்டையை கழட்டிவிட்டு தாத்தா அனைவரையும் கதற விடுகிறார் என்பதே ரசிகர்களின் கவலையாக உள்ளது.
மொத்தத்தில் இந்தியன் முதல் பாகத்தில் வரும் சேனாபதிக்கும் இதில் வரும் சேனாபதிக்கும் எந்த ஒரு தொடர்பும் இல்லாமல் இருக்கிறது.
