பிரபல தெலுங்கு இயக்குனர் எஸ்.எஸ்.ராஜமௌலி இயக்கத்தில் ஜூனியர் என்.டி.ஆர், ராம்சரண், ஆல்யா பட், அஜய் தேவ்கன் உள்ளிட்ட பலர் நடித்து வெளியான படம் ‘ஆர்.ஆர்.ஆர்’. இந்த படத்திற்கு கீரவாணி இசையமைத்திருந்தார்.
கடந்த ஆண்டில் வெளியாகி உலகம் முழுவதும் ஆயிரம் கோடிக்கு மேல் வசூல் சாதனை படைத்தது ஆர்.ஆர்.ஆர். அதை தொடர்ந்து தற்போது இந்த படத்தை கோல்டன் க்ளோப், ஆஸ்கர் என பல விருதுகளுக்கும் எடுத்து சென்றுள்ளார் ராஜமௌலி.
அதில் சிறந்த பாடலுக்காக கோல்டன் க்ளோப், சிறந்த வெளிநாட்டு திரைப்படம் மற்றும் பாடலுக்காக 2 கிரிட்டிக் சாய்ஸ் விருதுகள் என அடுத்தடுத்து பல விருதுகளை ஆர்.ஆர்.ஆர் வென்று வருகிறது.
இந்நிலையில் பிரபல ஹாலிவுட் இயக்குனர் ஜேம்ஸ் கேமரூன் ஆர்.ஆர்.ஆர் திரைப்படத்தை பார்த்துள்ளார். படத்தை வியந்து பார்த்த ஜேம்ஸ் கேமரூன் 10 நிமிடங்கள் அதுகுறித்து ராஜமௌலியிடம் பேசியுள்ளார். படத்தை பார்த்து வியந்ததோடு தனது மனைவியுடன் மீண்டும் வந்து படத்தை பார்க்க உள்ளதாகவும் அவர் தெரிவித்ததாக ராஜமௌலி தனது ட்விட்டரில் தெரிவித்துள்ளார்.
