தமிழ் சினிமாவிற்கு 20 வயதுகளில் வந்தும் கூட தனக்கென்று ஒரு இடத்தை பிடிக்க நடிகர்கள் தடுமாறி வரும் நிலையில் 27 வயதில் சினிமாவில் நடிக்க வந்து தனக்கென தனி இடத்தை பிடித்திருப்பவர் நடிகர் கார்த்தி.
மிக தாமதமாகவே இவர் தமிழ் சினிமாவில் காலடி எடுத்து வைத்தார். ஆனால் அவரது முதல் படமான பருத்திவீரன் திரைப்படமே எதிர்பார்த்ததை விடவும் பெரும் வெற்றியை பெற்று கொடுத்தது. முக்கியமாக வெளிநாட்டில் இருந்து படித்துவிட்டு வந்த கார்த்தி இப்படியொரு கதாபாத்திரத்தை இவ்வளவு சிறப்பாக நடிப்பார் என்று யாருமே எதிர்பார்க்கவில்லை.
அதனை தொடர்ந்து கார்த்தி நடித்த திரைப்படம் பையா. பையா படத்தின் படப்பிடிப்பு நடந்துக்கொண்டிருந்தப்போதே கார்த்தியும் தமன்னாவும் காதலிப்பதாக கிசுகிசுக்கள் வலம் வந்துக்கொண்டிருந்தன. இந்த நிலையில் இதுக்குறித்து சமீபத்தில் ஒரு பேட்டியில் பேசியிருந்தார் இயக்குனர் லிங்குசாமி.
அவர் கூறும்போது கார்த்தி அப்படிப்பட்ட ஆள் கிடையாது. அப்போதைய சமயத்தில் அவர் எது செய்வதாக இருந்தாலும் அவரது தந்தை சிவக்குமார் கூறுவது போலதான் செய்வார். தனியாக எந்த முடிவையும் எடுக்க மாட்டார். ஆனால் இப்படி பரவலாக கார்த்தியும் தமன்னாவும் காதலிப்பதாக வந்த வதந்திகளை நானும் கேட்டுக்கொண்டுதான் இருந்தேன்.
ஆனால் உண்மையிலேயே அவர்கள் காதலித்தார்களா என்பது அவர்களுக்கும் கடவுளுக்கும் மட்டுமே தெரியும். அந்த படத்தில் நடிக்கும்போது தமன்னாவிற்கு 19 வயதுதான் ஆகியிருந்தது. அப்போதே நான் கூறினேன் இன்னும் 20 வருடங்கள் கழித்தும் நீங்கள் இப்படியேதான் இருப்பீர்கள் என்றேன்.
பையா படத்தின் மறுவெளியீட்டுக்காக நான் தமன்னாவை சந்தித்தப்போது இந்த விஷயத்தை அவர் நினைவுப்படுத்தினார் என்கிறார் லிங்குசாமி.
