தற்சமயம் தமிழில் உள்ள இயக்குனர்களிலேயே மிகவும் பிரபலமானவர் என்று அழைக்கும் அளவிற்கு பெரும் வளர்ச்சியை கண்டுள்ளார் இயக்குனர் லோகேஷ் கனகராஜ். லோகேஷ் கனகராஜ் இயக்கிய ஒவ்வொரு திரைப்படமும் தமிழ் சினிமாவில் பெரும் வரவேற்பை பெற்றதோடு மட்டுமல்லாமல் பெரும் வசூல் சாதனையையும் பெற்று கொடுத்துள்ளது.
அந்த வகையில் தற்சமயம் அவர் இயக்கிய லியோ திரைப்படம் இதற்கு முன்பு அவரது படங்கள் கொடுத்த சாதனையை முறியடித்து புதிய சாதனையை கொடுக்கும் என்று எதிர்பார்க்கப்படுகிறது. லோகேஷ் கனகராஜ் பொதுவாக அவரது படத்தில் யார் வாய்ப்பு கேட்டாலும் அவர்களுக்கு வாய்ப்பு கொடுத்து விடுவார்.
ஆனால் அவர்களுக்கான கதாபாத்திரத்தை படத்தில் உருவாக்கும் பொழுது அதில் சில பிரச்சினைகள் நடப்பதும் உண்டு. உதாரணத்திற்கு மாஸ்டர் திரைப்படம் எடுக்கப்பட்ட பொழுது அதில் நடிகர் சாந்தனுவிற்கு முக்கியமான கதாபாத்திரத்தை எழுதியிருந்தார். படப்பிடிப்பு நடக்கும் பொழுதும் கூட விஜய்க்கும் சாந்தனுவிற்கும் நெருக்கமான உறவை ஏற்படுத்தும் வகையில் பல காட்சிகளை படத்தில் வைத்துள்ளார்.
முக்கியமாக விஜய்யும் சாந்தனுவும் சேர்ந்து சண்டை போடுவது போன்ற காட்சிகள் எல்லாம் எடுக்கப்பட்டிருந்தன. ஆனால் படமாக வரும் பொழுது சாந்தனுவின் காட்சிகள் முக்கால்வாசி தூக்கப்பட்டுவிட்டன. இதனால் மிகவும் மன வருத்தத்தில் இருந்தார் சாந்தனு.
இதனை அடுத்து லோகேஷ் கனகராஜும் பலமுறை அவரிடம் மன்னிப்பு கேட்டு இருக்கிறார். இந்த நிலையில் ஒருமுறை லோகேஷ் கனகராஜ் அவரது வீட்டிற்கு விருந்திற்கு சாந்தனுவை அழைத்துள்ளார். ஆனால் அழைத்த போதெல்லாம் சாந்தனு வரவே இல்லை. அப்பொழுது வேறு பட வேலைகள் இருந்ததால் அவரால் வர முடியவில்லை.
அதன்பிறகு வெகு நாட்களுக்குப் பிறகு விஜய் லோகேஷ் கனகராஜ் இருவரும் இருக்கும் பொழுது ஒரு நாள் லியோ படப்பிடிப்பிற்கு சாந்தனு வந்தார். அப்பொழுது விஜய்யிடம் பேசிய லோகேஷ் கனகராஜ் இங்கே பாருங்க அண்ணா இந்த சாந்தனு ரொம்ப ஓவரா பண்றான். நான் கூப்பிட்டால் கூட வீட்டிற்கு வர மாட்டிக்கிறான் என கம்ப்ளைன்ட் செய்திருக்கிறார் லோகேஷ் கனகராஜ்.
அதற்கு பதில் அளித்த விஜய் ஆமா நீ செஞ்சு சம்பவத்துக்கு அவன் எப்படி உன் வீட்டுக்கு வருவான் என்று நகைச்சுவையாக லோகேஷை கலாய்த்து விட்டிருக்கிறார். இந்த நிகழ்வை சாந்தனு ஒரு பேட்டியில் பகிர்ந்து இருந்தார்.
