எதிர்நீச்சல் சீரியல் புகழ் நடிகர் மாரிமுத்து திடீர் மரணம் – அதிர்ச்சியில் திரையுலகம்!..

தமிழ் சினிமாவில் பல வருடங்களாக பல்வேறு துறையில் பணியாற்றி வந்தவர் நடிகர் மாரிமுத்து. கிட்டத்தட்ட 50க்கும் அதிகமான படங்களில் துணை கதாபாத்திரங்களில் இவர் நடித்துள்ளார்.

1990களில் தனது ஊரானா தேனியை விட்டு சினிமாவில் சாதிப்பதற்காக வந்தவர் மாரிமுத்து. இவர் சில காலங்கள் இயக்குனர் வசந்திடம் உதவி இயக்குனராக பணிப்புரிந்து வந்துள்ளார். அப்போது ஆசை போன்ற சில படங்களிலும் இவர் உதவி இயக்குனராக பணிப்புரிந்துள்ளார்.

இது இல்லாமல் தமிழில் கண்ணும் கண்ணும், புலிவால் போன்ற திரைப்படங்களை இவரே இயக்கியுள்ளார். இவ்வளவு நாட்களாக இவருக்கென்று ஒரு அடையாளம் இல்லாமல் இருந்தது.

ஆனால் சில மாதங்களுக்கு பிறகு சன் டிவியில் ஒளிப்பரப்பாகும் எதிர்நீச்சல் நாடகத்தில் முக்கிய கதாபாத்திரமாக வாய்ப்பை பெற்றார் மாரிமுத்து. அது முதல் தமிழ்நாடு எங்கும் பரவலாக இவர் புகழ்பெற்றார். எதிர்நீச்சல் நாடகத்தில் வரும் குணசேகரன் என்கிற இவரது கதாபாத்திரம் வெகுவாக பிரபலமடைந்தது.

இப்போதுதான் கொஞ்சம் கொஞ்சமாக பிரபலமாகி வந்தார் மாரிமுத்து. இந்த நிலையில் சற்றுமுன் திடீரென ஏற்பட்ட மாரடைப்பின் காரணமாக காலமானார் நடிகர் மாரிமுத்து. இத்தனைக்கும் தற்சமயம் வெளியான ஜெயிலர் திரைப்படத்தில் கூட இவர் முக்கிய கதாபாத்திரத்தில் நடித்திருந்தார். அடுத்து வரவிருக்கும் இந்தியன் 2 திரைப்படத்திலும் இவர் நடித்துள்ளார்.

திடீரென ஏற்பட்ட இந்த மரணம் திரைத்துறையில் அதிர்ச்சியை ஏற்படுத்தியுள்ளது.