தமிழின் பிரபலமான இயக்குனர் செல்வராகவன் நடித்து மோகன் ஜி இயக்கத்தில் தற்சமயம் வெளியாகி இருக்கும் திரைப்படம் பகாசுரன். ஏற்கனவே ருத்ர தாண்டவம், த்ரெளபதி போன்ற படங்களை இயக்கியவர் இயக்குனர் மோகன் ஜி.

படத்தின் கதை:

இராணுவத்தில் இருந்து ரிட்டயர்டு ஆகி ஒரு யூ ட்யூப் சேனல் நடத்தி வருகிறார் நட்டி நடராஜன். அந்த சேனலில் குற்றங்கள் குறித்து விழிப்புணர்வுகளை ஏற்படுத்தி வருகிறார். திடீரென ஒரு நாள் அவரது அண்ணன் மகள் தற்கொலை செய்துக்கொள்ளவே அது ஏன் நடந்தது என்பதை கண்டறிய புலனாய்வு செய்கிறார் நட்டி.

இதே நேரத்தில் சிவபக்தராக இருக்கும் செல்வராகவன் தொடர்ந்து மர்மமான முறையில் கொலைகளை செய்து வருகிறார். இவர்கள் இருவரையும் ஒன்றிணைக்கும் புள்ளியாக டேட்டிங் ஆப் இருக்கிறது. டேட்டிங் ஆப் மூலம் பெண்கள் பாதிக்கப்படுவதாக கதைக்களத்தை வைத்து படத்தை இயக்கியுள்ளார் மோகன் ஜி.

எப்போதும் எந்த ஒரு ஆதாரமும் இல்லாமல் படம் எடுக்க கூடியவர் மோகன் ஜி என்று ஒரு பெயர் அவருக்கு உண்டு. ஏற்கனவே த்ரெளப்தி, ருத்ரதாண்டவம் திரைப்படங்களிலேயே சில வாட்ஸாப் ஃபார்வேர்டு மெசேஜ்களை உண்மை போல படத்தில் வைத்திருந்தார்.

இந்த நிலையில் தற்சமயம் இவர் டேட்டிங் ஆப் குறித்து சேகரித்த விஷயங்களும் கூட அப்படியானதாக இருக்குமோ? என்கிற கேள்வி பலருக்கும் வந்துள்ளது.

மேலும் இந்த படம் பெண்கள் ஒழுக்கமாக இருப்பதை குறித்து முக்கியமாக பேசுகிறது. ஆனால் இதற்கு முன்பு செல்வராகவன் இயக்கிய பல படங்கள் இதற்கு எதிராக இருந்தன. அப்படி இருக்கும்போது செல்வராகவன் எப்படி இப்படி ஒரு கதைக்களத்தை தேர்ந்தெடுத்தார் என கேள்வி எழுகிறது.

இவையெல்லாம் படத்தின் தவறுகளாக இருந்தாலும் பலருக்கும் இந்த படம் பிடித்துள்ளது.