தமிழ் சினிமாவில் தனித்துவமாக தெரியும் இயக்குனர்களில் மிக முக்கியமானவர் இயக்குனர் செல்வராகவன். செல்வராகவன் இயக்கிய திரைப்படங்களில் புதுப்பேட்டை மற்றும் ஆயிரத்தில் ஒருவன் இந்த இரண்டு திரைப்படங்களும் காலத்தை கடந்து அவர் பெருமையை கூறும் படங்களாக இருக்கின்றன.
முக்கியமாக அவரது தம்பி தனுஷ் திரைத்துறையில் பெரும் உயரத்தை தொடுவதற்கு அவர் முக்கிய காரணமாக இருந்துள்ளார். புதுப்பேட்டை திரைப்படம் குறித்து அவர் ஒரு பேட்டியில் பேசும்போது நிறைய சுவாரஸ்யமான விஷயங்களை பேசியிருந்தார்.
அதில் அவர் கூறும்போது ரசிகர்களை ஒரு கோட்டுக்குள் வைத்து நாம் பார்க்க கூடாது. ஒரு திரைப்படம் என்பது நல்ல படமாக இருந்தால் அதை இயக்கியது யார் அதில் நடித்தது யார் என்றெல்லாம் மக்கள் பார்ப்பது கிடையாது. அவர்கள் அந்த படத்தை கொண்டாடுகின்றனர்.
ஆனால் தமிழ் சினிமாதான் முன்னேறாமல் இருக்கிறது. ஒருமுறை ஒரு ரவுடி என்னை சந்தித்து பேசும்போது திரைப்படங்களில் நீங்கள் ரவுடிகளை எல்லாம் காட்டுவதை பார்த்தால் எங்களுக்கு சிரிப்புதான்யா வருகிறது என கூறினார்கள். அப்போதுதான் தமிழ் சினிமாவில் இவர்களை எவ்வளவு வேடிக்கையாக காட்டியுள்ளோம் என தெரிந்தது.
ஒரு ரவுடியை கதாநாயகனாக வைத்து படம் இயக்க வேண்டும் என்றால் கூட அதற்கு நிறைய தகவல்கள் தெரிந்துக்கொள்ள வேண்டும் என்கிறார் செல்வராகவன். அப்படி அவர் தகவல்களை சேகரித்து எடுத்த படமாக இருப்பதால்தான் புதுப்பேட்டை திரைப்படம் மட்டும் இப்போதும் தமிழ் மக்கள் மத்தியில் தனிப்பட்ட திரைப்படமாக இருக்கிறது.
