Senthil and goundamani : தமிழ் சினிமா நட்சத்திரங்களில் மிக முக்கியமானவர் நடிகர் விஜயகாந்த். சினிமாவை பொறுத்தவரை கதாநாயகனாக நடிக்கும் நடிகன் வெள்ளையாக இருக்க வேண்டும் என்கிற கருத்தை எப்போதோ உடைத்திருந்தார் நடிகர் ரஜினிகாந்த்.
அதற்கு பிறகு அதன் மீது இரண்டாம் கல்லை எறிந்தவர் நடிகர் விஜயகாந்த். பொதுவாக மக்களுக்கு அவர்களை போன்ற கிராம சாயலில் இருக்கும் கதாநாயகர்களையே அதிகம் பிடித்தது. அந்த வகையில் நடிகர் விஜயகாந்தை பெரும்பாலும் கிராம மக்களுக்கு பிடித்து போனது.
இந்த நிலையில் கவுண்டமணியும் செந்திலும் சினிமாவில் உயர்வதற்கு விஜயகாந்த் ஒரு பெரும் காரணமாக இருந்துள்ளார். நேரடியாக இல்லாவிட்டாலும் மறைமுகமாக அவர்களது சினிமா வாழ்க்கையில் விஜயகாந்திற்கு முக்கிய பங்குண்டு.
கவுண்டமணியும் செந்திலும் ஒரு காம்போவாக மக்கள் மத்தியில் பிரபலமாக்கிய திரைப்படம் வைதேகி காத்திருந்தாள். இந்த திரைப்படத்திற்கு பிறகுதான் இவர்கள் சேர்ந்து நடித்தால் நன்றாக இருக்கும் என மக்களும் திரைதுறையினரும் விரும்ப துவங்கினர்.
இந்த வைதேகி காத்திருந்தாள் திரைப்படத்தில் விஜயகாந்த் கதாநாயகனாக நடித்திருந்தார். இந்த படம் விஜயகாந்திற்காகதான் ஓடியது. ஆனால் அதன் மூலம் கவுண்டமணியும் செந்திலும் பிரபலமானார்கள்.
இந்த நிலையில் பிரபலமான கவுண்டமணியும் செந்திலும் பல படங்களில் சேர்ந்து நடித்தனர். ஆனால் சில காலங்களுக்கு பிறகு அவர்கள் இருவரும் பிரிந்து தனியாக நடித்தனர். உதாரணத்திற்கு ரஜினிகாந்த் செந்தில் மற்றும் கவுண்டமணியுடன் தனி தனியாக நடித்திருப்பதை பார்க்க முடியும்.
கவுண்டமணியுடன் மன்னன் திரைப்படத்திலும் செந்திலுடன் அருணாச்சலம், வீரா மாதிரியான படங்களிலும் நடித்திருப்பார். இந்த காலக்கட்டங்களில் அவர்கள் பிரிந்து இருந்தனர். அதன் பிறகு அவர்கள் இருவரும் மீண்டும் சேர்ந்து நடித்தப்போது சமுத்திரம், ஜெய்ஹிந்த் மாதிரியான சில படங்களில் அவர்கள் சேர்ந்து நடித்தனர்.
அதற்கு மக்கள் மத்தியிலும் வரவேற்பு இருந்தது. ஆனால் அவர்கள் இறுதியாக சேர்ந்து நடித்த திரைப்படம் சொக்கதங்கம். அதற்கு பிறகு இருவரும் சேர்ந்து நடிக்கவில்லை. அந்த படமும் விஜயகாந்தின் படமாகும். எனவே அவர்கள் சேர்ந்து நடித்து முதன் முதலாக ஹிட் அடித்த படமும் விஜயகாந்த் படம் தான். அதே போல் அவர்கள் இறுதியாக நடித்த படமும் விஜயகாந்த் படம்தான்.
இப்படி மறைமுகமாக செந்தில், கவுண்டமணி சினிமா வாழ்க்கையில் விஜயகாந்தின் பங்கும் உள்ளது.
